"Саламатты Қазақстан" медициналық пойызы Тұрыш ауылына келді

Бүгін «Саламатты Қазақстан» медициналық пойызы Бейнеу ауданының Тұрыш ауылына келіп аялдады. Дәрігерлер ертеңге дейін сағат 09:00-18:00 аралығында тұрғындарды қабылдап, тегін қызмет көрсетеді, - деп хабарлайды mangystaumedia.kz сайты.

Медициналық пойыз дәрігерлерін Бейнеу аудандық ішкі саясат, мәдениет, тілдерді дамыту және спорт бөлімінің басшысы Тұралы Жолышов, Бейнеу көпбейінді орталық аудандық ауруханасының директоры Берік Абдуллаев және ауыл ақсақалы Омар Сәдіғұлов күтіп алып, игілікті іске қолдау көрсетіп, тілек білдіріп, сәттілік тіледі.

«Саламатты Қазақстан» пойызы 3-25 мамыр аралығында Маңғыстау облысында болады және Тұрыш, Сам, Сайөтес, Өзен, Болашақ, Жетібай, Қарақия, Шетпе, Үстірт, Тірек станцияларына тоқтайды. Заманауи диагностикалық құралдармен қамтамасыз етілген пойыз – шалғай аудандар мен ауылдарда тұратын азаматтарға медициналық, психологиялық, құқықтық және медиативтік көмек көрсетуді мақсат еткен. Барлық ем шара міндетті әлеуметтік медициналық сақтандыру және тегін медициналық көмектің кепілдендірілген көлемі шеңберінде жасалады.

Еске салайық, пойыз құрамында 40 маман – медицина қызметкерлері, медиаторлар мен заңгерлер бар. Дәрігерлік құрамда терапевт, хирург, педиатр, психолог, невропатолог, ультрадыбыстық диагностика маманы, жалпы тәжірибелік дәрігер, рентгенолог, кардиолог, стоматолог, офтальмолог, отоларинголог, педиатр, онколог-маммолог, гинеколог және уролог мамандары бар. Қажет болған жағдайда мамандар шағын операциялар жүргізіп, жоспарлы емдеуге жолдама береді.

Аталған жоба ҚР Президенті жанындағы Әйелдер істері және отбасылық-демографиялық саясат жөніндегі Ұлттық комиссия, Денсаулық сақтау министрлігі және «Самұрық-Қазына» АҚ қолдауымен Астана қаласынан бастау алған.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.